pregnancy

وردات مختلفة من جنينة واحدة - أشعار عامية

طارق عميرة
tarekpen2000@gmail.com


-1-
النهاردَه
عدّى كتير من يوم ما سبتِك
سبتيني أصرخ وأنادي إسمِك
وأقول حبيبتي..
يا بعيدة جدًا ..
والكون ينادي , والديك بيدّن
بيصيح  معايَا
يعلن نهَايِة آخر حكَاية
يعلن وفَاة صوتِك وحسّك ..
يعلنِ وفاتِك ..
وكمَان وفاتِي
لما لقيت على بابِي علبَة
فيهَا رفاتِك !

-2-
ساعِة الممَات ..
قعدت أجمّع في الفُتَات
روحِي بتنزِف ..
وعقلي حيران من الشتات
هل من النهارده ؟
مفيش حبيبتي ؟
آهو وإنتي جنبي
بحكي في خيبتي
بشوف خيالك
واقول دي ليلتي
واعدك بروحي  ولحد شيبتي ..
دلوقتِي مين شايف مصيبتي ؟
كل اللي بيننا .. بقى ذكريات ..
وكلامنا كلّه ..
أصبَح سُكَات ..
الحبّ عايش
والقلب مات !

-3-
انا عايز اعيّط
قالوا في العياط
تنزل همُوم
وسط الدموع
قالوا العياط
أبسَط طريق ..
ضدّ الرجُوع
قالوا الآلام ..
لما تمُوت من غير عياط ..
هفضَل بشَر موجُوع ..
قالوا الشلل
لما يسيطر عالحيَاة
يبقى الأمل ممنُوع
طالبونِي أعيّط
وقالولي فعلاً ..
خيّط جروحَك
وعيّط شويّة ..
بقالك كتير
فاقِد هويّة ..
رديت في نفسي ..
من غير ما أخيط
من إمتى اصلاً
بطلّت أعيط ؟!

- 4-
سألوني مرّة
وألف مرّة ..
بطّل تهوّر ..
الشيء عليه ييجي ألف حارس ..
وإنتَا مناضِل
عامِل شهيد وبقلب فارس
عامِل شُجَاع والكل خارِس
خليك كدَا سارح في خيبتَك
وكئيب حزين فاقد لهيبتَك ..
من إمتى غيّرت حياتَك ؟
ولإمتى هتأجّل نتيجتَك ؟
خليك كدا واقف مكانِك ..
يمكن في يوم تلقَى زمانَك !
وتلاقي ناس تهتف معاك
ويقولوا زيّك نفس كلامك
ويعيشوا حلمَك ويعيشوا ألمَك
وحتّى جهلَك أو علامَك ..
ما تفوق يا عم
فيه سحابة سودا واكلة دماغك
وفي كل مرّة ..
ردّي إمتنَاع عن الإجابَة ..
وسؤالَ محيّر
إمتى هتروح السحَابَة !
شكرا لتعليقك